Leah Nyudike 
Mwenyekiti wa Umoja wa Vyama Vikuu vya Ushirika wa Tumbaku (TCJE), Emanuel Charahani amesema dhamira ya kujenga kiwanda cha kuchakata tumbaku mkoani Tabora inasubiri utekelezaji baada ya wajumbe wa vyama vyote kutoka Kigoma, Kahama na Mpanda kupitisha wazo hilo.
Charahani ameeleza kuwa kupitia kiwanda hicho kinachitarajiwa kujengwa wilayani Urambo, wakulima hao watahamasika kuzalisha zaidi ambapo wanategemea kukijenga Wilaya ya Urambo na takribani watu 3,000 wataajiriwa kila msimu.
Hata hivyo, Mwenyekiti wa Halmashauri ya Wilaya ya Uyui, Said Ntahondi amesema kiwanda hicho ni muhimu kwa wakulima wa zao hilo, na kwa sababu vyama vyote vimekubaliana na mpango huo wakulima wanakisubiri kwa hamu na wamekubaliana na hoja ya kuchangia Sh. 9 kwa kila kilo watakayouza ili kufanikisha mpango wa ujenzi huo.
Ntahondi amesema hadi sasa eneo la ujenzi wa kiwanda hicho limeshapatikana na wakifanikiwa kukusanya fedha hizo kutoka kwa wakulima wanatarajia kupata hadi Sh. 700 milioni hadi mwisho wa msimu wa kilimo wa mwaka huu.
