Benki ya CRDB imetoa zawadi kwa wanafunzi wa vyuo mbalimbali nchini ikiwa ni sehemu ya kampeni yake ya JIPE 5 iliyozinduliwa Oktoba mwaka huu ikilenga kuhamasisha Watanzania kujiwekea akiba kuelekea mwisho wa mwaka.
Meneja mwandamizi wa Idara ya Wateja Binafsi wa Benki ya CRDB, Abel Lasway, amesema hadi kufikia Desemba 16, benki tayari imeshatoa zawadi zinazofikia Sh milioni 20.
Zawadi hizo zimetolewa kwa wateja zaidi ya 4000 huku akaunti zaidi ya 74,000 zikiwa zimekwisha funguliwa.
“Tunawashukuru sana Watanzania kwa kuipokea vyema kampeni ya Jipe Tano ambapo mafanikio yaliyopatikana sio tu ni kwa faida ya Benki ya CRDB bali yanaonyesha ni kwa jinsi gani benki imeweza kuwajumuisha Watanzania wengi katika mfumo rasmi wa huduma za fedha,” amesema Lasway.
Meneja huyo amesema katika kampeni hiyo ya Jipe Tano makundi mbalimbali ya wateja yameweza kuzawadiwa ambapo kwa mwezi huu benki inawazawadia ada za shule wazazi wanaofungua akaunti ya watoto ya Junior Jumbo ambapo Sh milioni 30 zimeandaliwa.
“Benki ya CRDB tunajinasibu kwa kaulimbiu yetu ya ‘Ulipo Tupo’ ambayo haiishii tu kufikisha huduma mahali ambapo wateja wetu wapo bali inalenga kuhakikisha benki inakua pamoja na mteja katika hatua zote za maisha yake,” amesema.
Amesema pia Benki ya CRDB ililenga kundi la wanafunzi wa vyuo ambavyo vimefunguliwa hivi karibuni ambapo timu ya mauzo ya benki iliweka kambi katika vyuo mbalimbali nchini ili kutoa elimu ya masuala ya fedha pamoja na kutoa huduma za kufungua akaunti kwa wanafunzi.
Lasway alisema “tumefurahi kuona tumeweza kufanikiwa kuwaingiza katika mfumo rasmi wa fedha wanafunzi wengi na tukaona pamoja na kuwapa huduma hizi tuweze kuwazawadia vitu ambavyo vitarahisisha maisha yao wawapo chuoni”.
Aidha amesema kupitia kampeni hiyo ya wanafunzi ya JIPE 5 na Scholar, jumla ya wanafunzi 100 kutoka vyuo mbalimbali nchini watazawadiwa laptop (kompyuta mpakato) na smart phone (simu janja).
Discussion about this post