Tuzo za Chaguo la Mteja zazinduliwa

315

Tuzo za Chaguo la Mteja 2021 (Tanzania Consumer Choice Awards TCCA) zimezinduliwa.

Tuzo hizo zinamsaidia mteja kupigia kura kampuni bora katika utoaji wa huduma.

Uzindiuzi huo, umefanyika katika Hotel ya Onomo jijini Dar es Salaam ambapo mgeni rasmi alikuwa ni Mkurugenzi Mkuu wa Mamlaka ya Maendeleo ya Biashara Tanzania (TanTrade) Balozi Dk Edwin Rutageruka.

Akizungumza wakati wa uzinduzi, Balozi Rutageruka amepongeza tukio hilo na kusema ni mpango thabiti katika maendeleo ya biashara.

“Tuzo hizi ni za kipekee, zinahamasisha ushindani na viwango katika utoaji wa huduma,” amesema.

Ameongeza kuwa “kwa kuwawezesha walaji/wateja kupigia kura kampuni bora katika utoaji wa huduma kulingana na ahadi za uzalishaji wao, kunafanya kampuni kuheshimu huduma na uwasilishaji wa bidhaa”.

Tuzo hizo ni za kipekee na zinampa nguvu mlaji ambae ni mtumiaji wa mwisho wa huduma kuchagua kampuni anayoiona ni bora.

Akizungumza juu ya uwazi wa upigaji kura, Mkurugenzi Mshirika wa Price and Cooper (PCW) Delvina Libent amesema zoezi la upigaji kura linahakikiwa vikali.

“Kazi yetu ni kuhakikisha zoezi la upigaji kura halichakachuliwi na matokeo huwa wazi na kweli,” amesema.

Mwanzilishi na Mkurugenzi wa Tuzo za TCCA Diana Simon Laizer amesema tuzo hizo zilianzishwa kwa mara ya kwanza hapa nchini mwezi Septemba 2019, na mpaka sasa wamefanikiwa kuandaa tafrija mbili za utoaji tuzo za Biashara na makampuni kupitia kura za wateja.

Amesema ni heshima kuwapa walaji wa Tanzania uwezo wa kuchagua kampuni bora katika utoaji wa huduma.

Laizer amesema “nipende kuishukuru serikali yetu ya Rais Samia Suluhu Hassan, kwa uongozi bora ambao umetushika mkono kupitia Wizara ya Viwanda na Biashara ambayo kwetu ndio Wizara baba. Tangu kuanzishwa kwa tuzo hizi mwaka 2019 wamekua wakitushika mkono, na sasa mwaka huu tumeingia ubia rasmi na kitengo cha Tantrade Tanzania ,chini ya uongozi mahiri wa Balozi Dk Edwin Rutageruka.

Kwa kutupa kitengo cha Tantrade Tanzania kuwa wabia rasmi katika uandaaji wa hafla ya Chaguo la Mteja Afrika ambayo itafanyika kwa mara ya kwanza tarehe 5 Disemba 2021 Dar Es salaam. Tunaamini Kwa ushirikiano huu, tunaenda kufanya jambo lililo bora na jema, ambalo litaitangaza vizuri Tanzania katika soko la nje.”

Ameeleza kuwa dirisha la mapendekezo limefunguliwa na walaji wanaweza kupendekeza kampuni kupitia tovuti ya www.ccawardsafrica.co.tz.

“Tunapokea mapendekezo katika vipengele vyote ambavyo tumeviainisha katika kipengele cha “Nominate'” kilichopo kwenye tovuti ambapo mtu kutoka nchi yoyote anaweza kutuma mapendekezo juu ya washiriki kulingana na kipengele na ukanda wa nchi anayotoka mfano ukanda wa Afrika Mashariki, ukanda wa Afrika Kusini nakadhalika.

Amebainisha kuwa upigaji kura utafanyika kupitia tovuti hiyo hiyo.

“Vipengele vimeandaliwa kumpa muongozo anae pendekeza na sisi tutazidi kutoa muongozo wa namna ya kujaza fomu za mapendekezo mpaka pale tutakapofunga dirisha July 15 2021.

Amewataja wabia wao katika usimamizi wa kura kuwa ni Pwc Tanzania, wafadhili Absa Bank Tanzania, SGA security limited, Hugo Domingo Limited, Azania Group LTD Revolution events, Onomo Hotel, Delphina Promotions Limited,EF outdoor limited, vyombo vya habari shirika, Gazeti la The Exchange Afrika na Global Publishers.

Washindi watatangazwa tarehe 5 Disemba jijini Dar es Salaam.