Waziri Mkuu wa Tanzania Mh. Kassim Majaliwa amesema kuanzia mwezi Januari hadi Machi mwaka huu, serikali imefanikiwa kupata mapato ya Sh. 714 milioni, fedha ambazo zimepatikana miezi mitatu tu tangu ujenzi wa ukuta katika migodi ya madini ya Mirerani mkoani Manyara ikilinganishwa na Sh. 147.1 milioni zilizopatikana katika kipindi chote cha mwaka 2017.
Majaliwa amesema hayo wakati akihitimisha hotuba ya makadirio na matumizi ya ofisi yake kwa mwaka wa fedha 2018/2019 bungeni Dodoma ambapo amesisitiza kuwa ongezeko la mapato limetokana na jitihada zilizofanywa na serikali kuimarisha ulinzi wakati wote wa ujenzi wa ukuta katika migodi hiyo ya tanzanite.
Pamoja na manufaa hayo, Waziri Mkuu pia ametangaza mpango wa kujenga nyumba ambazo zitatumika kama sehemu ya kuuzia madini ili wananchi waishio maeneo ya karibu waweze kufaidika na rasilimali zinazowazunguka.
Discussion about this post