Viwanda vingine hatarini kufutiwa umiliki

Na Mwandishi wetu

Muda mfupi baada ya serikali kutangaza kufuta umiliki wa viwanda 10 ambavyo wamiliki wameshindwa kuviendeleza, viwanda vingine vipo katika hatari ya kufutiwa umiliki baada ya Katibu Mkuu wa Wizara ya Viwanda, Biashara na Uwekezaji Dk. Adelhelm Meru kukutana na wamiliki wa viwanda hivyo 11 kwa ajili ya mazngumzo ili kufikia suluhu na kuwapa fursa wenye uwezo wa kuviendesha.

Katibu Mkuu huyo amesema wakati alipokutana na wamiliki hao jijini Dar es salaam kuwa serikali imevumilia vitendo vya kudorora kwa viwanda kwa kipindi kirefu na imefikia maamuzi ya kuvichukua viwanda hivyo na kuruhusu wenye uwezo wa kuvifufua upya kujitokeza ili waviendeleze na kutoa ajira hapa nchini.

Dk. Meru amesisitiza kuwa serikali haijachukua viwanda hivyo ili kuwapa wenye uwezo, bali imeamua kuzungumza moja kwa moja na wamiliki hao ili wapate fursa ya kusema kama wataviendeleza au wameshindwa. Amesema kuwa serikali ni sikivu ndiyo maana wamiliki hao wameitwa na kupewa nafasi ya kujieleza. Ameongeza kuwa lengo kubwa la serikali ni kuvichukua viwanda hivyo na kuwapatia watakaomudu kuvifanya vizalishe na kuongeza mapato.