Umuhimu wa ushirikiano na brandi zingine

138

Mchakato wa kushirikiana baina ya  brandi katika kampeni mbalimbali umekuwa ukitumika katika tasnia zilizopo ili kuweza kupata faida zaidi na kuleta uhamasishaji baina ya pande zote mbili za brandi husika.

Kama brandi ni muhimu kutambua jinsi ushirikiano na brandi nyingine utakavyofaidisha biashara au kampuni yako tokea mwanzo. Fahamu matokeo  unayotarajia, angalia kama watu wameshaanza kusahau bidhaa au huduma unayouza, kwa kujua hilo itarahisisha kujua matokeo unayotarajia katika kampeni husika na brandi nyingine.

Ili kuweza kupata matokeo mazuri kutokana na ushirikiano  na brandi nyingine ni muhimu  kujua kama brandi hiyo ina maono sawa na ya biashara yako, ikiwa ni pamoja na kuelewa biashara yako na hata wewe kuelewa biashara yao. Hii itasaidia kutengeneza kampeni itakayo leta faida katika pande zote mbili kwa gharama ndogo.

Mitandao ya kijamii ni muhimu sana ikiwa brandi mbili zinafanya kampeni kwaajili ya kupata wateja wengi zaidi.  Ni dhahiri kuwa wateja wa pande mbili kwa namna moja au  nyingine wanatumia huduma au bidhaa za brandi hizo, hivyo kwa kuchapisha maudhui ya kampeni hiyo katika hadhira stahiki matokeo yatakuwa ya kulidhisha na pande zote mbili zitapata wateja wapya, na hata kuwakumbusha wateja wa zamani uwepo wa brandi hizo.

Kuna msemo unaosema ‘vichwa viwili ni bora kuliko kimoja’ hivyo kupitia ushirikiano baina ya brandi mbili, wafanyakazi watapata fursa ya kujifunza mambo mapya kutoka katika brandi nyingine hata baada ya kampeni kuisha wanaweza kutumia ujuzi mpya kuboresha shughuli mbalimbali za brandi yao ili kuweza kuleta mafanikio zaidi.

Ieleweke kuwa ushirikiano baina ya brandi mbili utaleta maoni mazuri na mabaya kutoka kwa hadhira, lakini hii isiwe sababu ya biashara mbalimbali kutokushirikiana. Ushirikiano  sio kitu cha kuhofiwa au kuogopwa kwasababu matokeo yako huwa mara mbili zaidi. Kujaribu na kufanikiwa au kufeli huelimisha wamiliki na watu wote wanaokuhusika katika biashara hii husaidia kuboresha biashara ili iweze kukua katika misingi sahihi na kuweza kufikia malengo.

Ushirikiano na brandi nyingine unaweza kuwashangaza wateja wako na hata kuwavutia wateja wapya. Ikiwa unaboresha muonekano wa brandi yako, unaingia katika soko jipya, au unazindua bidhaa mpya shirikiana na brandi nyingine zenye mitizamo sawa na ya kwako kukuza kile unachokifanya na kuitangaza biashara yako katika njia mpya na kwa watumiaji wa kisasa.