Patricia Richard 
Balozi wa Uswisi hapa nchini, Florence Mattli amesema ubalozi huo kupitia Shirika la Maendeleo na Ushirikiano la Uswisi (SDC) unatarajia kutoa Sh. 18 bilioni kwa muda wa miaka minne ijayo, kwa lengo la kuwezesha baadhi ya asasi za kiraia zikiwemo Policy Forum, Twaweza na Foundation for Civil Society (FCS) kuimarisha utendaji kazi pamoja na uwajibikaji ili kuimarisha huduma wanazotoa kwa wananchi.
Mattli ameeleza hayo jijini Dodoma na kuongeza kuwa, Uswisi inaamini asasi za kiraia zina mchango mkubwa katika kuiwezesha Tanzania kufikia malengo yake ya Dira ya Maendeleo ya Taifa ya mwaka 2025 hivyo fedha hizo zitasaidia kukuza uwajibikaji katika mamlaka mbalimbali na kuboresha usimamizi wa sera za maendeleo.
Kwa upande wake, Mkurugenzi Mtendaji wa Twaweza, Aidan Eyakuze amesema msaada huo utasaidia taasisi hizo kuendeleza ushirikiano uliopo baina yao na serikali.
“Asasi nyingi za kiraia zina mawazo mazuri lakini hazina uwezo wa kuwasilisha mawazo hayo kwenye ngazi husika, msaada huu utatusaidia kuwafikia na kuwawezesha kuwasilisha mawazo ya wananchi”. Amesema Eyakuze.
