Mauzo ya Tanzania Ujerumani Dola 42.05m kwa mwaka

165

Tanzania imekuwa ikiuza nchini Ujerumani bidhaa zenye thamani ya wastani wa Dola za Marekani milioni 42.04 kwa mwaka.

Kwa mujibu wa Mmamlaka ya Mapato Tanzania (TRA) bidhaa kuu ambazo Tanzania inauza Ujerumani ni pamoja na kahawa, asali, tumbaku, pamba, samaki, nta na vito vya thamani.

Taarifa ya Wizara ya Mambo ya Nje na Ushirikiano wa Afrika Mashariki inaeleza kuwa Tanzania pia inaagiza bidhaa kutoka Ujerumani zenye wastani wa Dola za Kimarekani milioni 237.43 kwa mwaka.

Bidhaa hizo ni pamoja na dawa, vifaa tiba, mafuta (manukato na vipodozi) magari, vifaa na mashine za umeme.

Taarifa hiyo inaeleza kuwa kwa upande wa uwekezaji, Ujerumani ni miongoni mwa nchi kumi zinazoongoza kwa uwekezaji nchini.

“Kwa mujibu wa Kituo cha Uwekezaji Tanzania (TIC), hadi kufikia Agosti 2023, miradi 178 ya Ujerumani yenye thamani ya Dola za Marekani milioni 408.11 ilisajiliwa na kutoa fursa za ajira zipatazo 16,121,” imesema taarifa hiyo.

Kwa upande wa Zanzibar, Mamlaka ya Kukuza Uwekezaji Zanzibar (ZIPA) imefanikiwa kusajili miradi 15 yenye thamani ya Dola za Marekani milioni 300.00 ambayo imezalisha ajira 905.

Kampuni za Kijerumani zilizowekeza nchini zinajihusisha zaidi na sekta za kilimo, viwanda, nishati mbadala, ujenzi, utalii, sanaa na utamaduni.