Patricia Richard 
Kila mtu anatamani kufikia mahali fulani katika maisha. Wote tuna malengo ambayo tunayafanyia kazi na tunatarajia kuwa siku moja yatatimia na maisha yatabadilika kuanzia hapo. Changamoto inayowakuta wengi ni utekelezaji wa malengo haya kwani kuna muda unafika unapata vikwazo mbalimbali na hata kukata tamaa. Hili ni jambo la kawaida na hali hii inapotokea hutakiwi kuacha kupigania malengo yako hata kama ni ngumu kufanya hivyo.
Hapo chini ni njia 3 za kukufanya uendelee kufanya kazi kwa bidii ili kutimiza malengo yako.
1. Kuwa mkweli na nafsi yako
Ni muhimu kuwa mkweli na kukubali kuwa unakosea ikitokea unafanya hivyo. Unapaswa kuwajibika na kuona hali halisi pale ambapo unashindwa kutekeleza majukumu yako kama inavyotakiwa. Fahamu uwezo ulionao katika kufanikisha malengo yako lakini pia fahamu na kubali changamoto ulizonazo ili kujua jinsi ya kupata suluhisho.
2. Zingatia ratiba yako
Tengeneza ratiba ambayo itakuongoza kufanya kazi zako na kisha hakikisha kuwa unaifuatilia. Kuwa na ratiba maalum mbali na kukujengea uwezo wa kuheshimu muda wako pamoja na wa watu wengine, pia ni njia nzuri ya kujua ni nini hasa unafanya na kufanikisha kwa siku, wiki, mwezi na hata mwaka. Hakikisha kuwa unakuwa na ratiba maalum ambayo inakuwezesha kutekeleza majukumu yako kwa mpangilio unaoeleweka.
3. Usikate tamaa
Mambo yanapokuwa magumu usivunjike moyo. Huu ni wakati wa kuweka jitihada zaidi na kuhakikisha kuwa malengo yako yanafanikiwa. Fikiria kwanini unataka kufanikisha malengo yako na wekeza nguvu zaidi katika kuyatimiza. Unapokwama, usione tabu kuomba msaada kutoka kwa watu wako wa karibu au wataalamu wa biashara, mambo ya fedha n.k.
