Patricia Richard 
Serikali kupitia wizara ya Sera, Bunge Kazi, Vijana, Ajira na Walemavu imewaondolea hofu wawekezaji na badala yake kuwataka kufuata sheria za nchi ili kuepuka usumbufu kutoka serikalini pindi wanapokiuka sheria.
Hayo yameelezwa na Naibu Waziri Antony Mavunde katika mkutano ulioandaliwa na Chama cha Wafanyakazi na Wawekezaji kutoka nchini China kwa lengo la kuendelea kuimarisha mahusiano mazuri ya kibiashara.
Waziri Mavunde amesema kuwa amefurahishwa na mkutano huo ambao lengo kuu lilikuwa ni kuzungumzia sheria za kazi na vibali vya wakazi.
Soma Pia Wawekezaji dawa za mifugo washauriwa kuchangamkia fursa
Waziri Mavunde ameeleza kuwa serikali ya awamu ya tano inahitaji sana wawekezaji kwa ajili ya kuleta maendeleo nchini, sanjari na kuongeza fursa za ajira kwa vijana wa kitanzania.
“Serikali ya Tanzania inawahitaji sana wawekezaji wanaofuata sheria za kazi na ukaazi (uhamiaji) kwa Wafanyakazi na wataalamu watakaoletwa nchini”
Aidha Waziri Mavunde amepongeza juhudi kubwa zilizofanywa na Chama cha Waajiri Tanzania (ATE) kwa kuweza kutafsiri sheria za kazi kutoka lugha ya kiswahili kwenda kichina ili kuwarahisishia wawekezaji hao kuzielewa vizuri sheria hizo.
Naye Mkurugenzi Mtendaji wa ATE Dk. Aggrey Mlimuka ameishukuru serikali kuitikia mwaliko, huku akisisitiza kuwa lengo la mwaliko huo ni kuikutanisha serikali na wawekezaji kujadili namna nzuri ya kukuza sekta ya uwekezaji kwa sababu uwekezaji mzuri ni ule unaoendana na mazingira mazuri sambamba na utii wa sheria zilizowekwa nchini.
Soma Pia Uboreshaji wa miundombinu wavutia wawekezaji
Akielezea baadhi ya changamoto wanazopata wawekezaji Dk. Mlimuka amesema ucheleweshaji wa vibali kwa mwekezaji, kutotii sheria za makazi hapa nchini ni baadhi ya vitu vinavyorudisha nyuma uwekezaji nchini.
