Patricia Richard 
Benki ya NMB imezindua kampeni iliyopewa jina la ‘MastaBata’ ambapo wateja wanaofanya malipo kupitia mifumo wa ‘NMB Mastercard’ au ‘NMB Masterpass’ watashinda fedha taslimu, simu janja pamoja na safari ya kwenda Dubai. Mkuu wa Kitengo cha Biashara za Kadi wa benki hiyo, Boma Raballa amewaambia waandishi wa habari jijini Dar es salaam kuwa, katika kampeni hiyo zaidi ya Sh. 100 milioni zitashindaniwa.
Raballa ameeleza kuwa, takribani wateja 200 wa NMB ambao watafanya malipo kupitia ‘NMB Mastercard au ‘NMB Masterpass’ watakuwa kwenye uwezekano wa kushinda zawadi mbalimbali na kuongeza kuwa shindano hilo litaendeshwa kwa muda wa miezi miwili, lengo likiwa ni kuwahamasisha wateja kutumia ‘NMB MasterCard’ kulipia huduma na bidhaa kwenye vituo vya malipo hayo (POS) au malipo kutumia mtandao (E-commerce).
“Kampeni hii licha ya kuhamasisha matumizi ya malipo kwa kutumia kadi pia imelenga kuwazawadia wateja wetu ambao wanaenda sambamba na safari ya mabadiliko kuingia mfumo wa huduma za kidigitali za kibenki”. Amesema Raballa.
Aidha, Mkuu huyo wa kitengo amesema washindi 20 watapatikana kila wiki na watajishindia Sh. 100,000 ndani ya kipindi hicho cha miezi miwili, huku washindi wengine 6 wa mwezi wakiondoka na simu janja za kisasa ‘Samsung S9+’ na washindi wengine 3, kati yao wawili watajishindia safari ya mapumziko iliyolipiwa kila kitu kwenda Dubai.
