Na Mwandishi wetu
Kampuni ya simu za mkononi ya Airtel na Mamlaka ya Elimu ya Ufundi Stadi Tanzania (VETA) jana wamezindua namba maalum zitakazowezesha wateja na wanafunzi wanaojiunga na huduma ya masomo kupitia VSOMO kupata maelekezo ili kurahisisha upatikanaji wa elimu ya ufundi stadi kwa gharama ya Sh 60 tu.
Mkuu wa Kanda ya Chuo cha Veta, Habib Bukko amesema VETA ina malengo ya kuwawezesha watanzania ili wapate kushiriki kiutendaji katika sera ya uchumi wa viwanda. Hivyo wanafunzi waliokwama watapata fursa ya kujiendeleza kwa njia rahisi ya simu zao. Namba zilizozinduliwa ni 0699 859573 na 0699 859572 ambazo zitawezesha wanafunzi kusoma kupitia mfumo wa VSOMO na kuweza kukamilisha malengo yao bila kikwazo chochote.
Mkuu wa Chuo cha VETA Kipawa ambaye pia anasimamia mpango huu wa VSOMO Mhandisi Lucias Luteganya ameongeza kuwa huduma hii itapatikana siku zote za wiki kuanzia saa mbili asubuhi mpaka saa kumi na moja jioni. Amemalizia kuwa mpango huu wa VSOMO utaongeza kozi nyingi zaidi kulingana na mahitaji.
Discussion about this post