Kiwanda cha zabibu kuanzishwa Dodoma

Na Mwandishi wetu

Mkurugenzi wa Halmashauri ya Chamwino mkoani Dodoma Athumani Masasi amesema halmashauri hiyo imesaini mkataba na mashirika ya GEPF, WCF na TIB ilikusaidia soko la zabibu ambalo lina changamoto kubwa mkoani humo.

Akiwa katika kikao cha baraza la madiwani wa halmashauri hiyo, mkurugenzi huyo amesema kuwa hatua hiyo imetokana na shida wanayopata wakulima wa zabibu kutafuta soko, hivyo kuanzisha kiwanda cha zabibu kutawapa wakulima mkoani humo pamoja na mikoa ya jirani soko la uhakika la kuuza zao hilo.

Masasi pia amesema kufunguliwa kwa kiwanda hicho kutawezesha vijana kuajiriwa na hivyo mapato ya halmashauri kuongezeka na wilaya hiyo itakuwa mfano wa kuigwa hapa nchini kutokana na juhudi zinazofanyika ili kukuza soko la zao hilo.

Wakulima mkoani hapo wameshauriwa kupanua kilimo hicho kwa wingi ili kunufaika zaidi na fursa baada ya kukamilika kwa kiwanda hicho ambacho kitafanya soko la zao la zabibu kuwa rahisi.

Mradi huo unategemea kuanza Oktoba mwaka huu na kwa sasa wataalamu kutoka kampuni ya Archouant Services Limited wanapitia michoro ya mradi huo na mpango wa biashara ambao utawasaidia wakulima.