Wapandisha bei msimu wa Ramadhan waonywa

Kamishna wa Bodi ya Mapato Zanzibar (ZRB) Joseph Abdallah Meza ametoa onyo kwa wafanyabiashara wenye mazoea ya kutumia mfungo wa Ramadhan kupandisha bei kiholela ili kujiongezea kipato. Kamishna huyo amedai imekuwa kawaida kwa wafanyabiashara kuwa na tamaa na kupandisha bei ovyo hali ambayo imekuwa inawapa shida wananchi.

Ameongeza kuwa bidhaa zinazopanda bei ni zile zinazozalishwa ndani ya nchi na bodi hiyo inaandaa mkakati wa kupunguza ushuru kwa bidhaa zenye uhitaji mkubwa zaidi kipindi cha mwezi mtukufu kama vile tende na tambi.

Kwa upande wao, baadhi ya wafanyabiashara wamejitetea kuwa wanalazimika kupandisha bei kutokana na gharama wanazotumia katika ununuzi na usafirishaji kupanda huku wengine wakisema inawalazimu kuongeza bei baada ya wakulima nao kupandisha bei zao.