Vitalu nyumba kukomboa vijana

Waziri wa Nchi, Ofisi ya Waziri Mkuu (Sera, Bunge, Kazi, Vijana, Ajira na Wenye Ulemavu) Jenista Mhagama amesema serikali imepanga mikakati madhubuti ya kuboresha upatikanaji wa ajira kwa vijana nchini, kupitia teknolojia ya kilimo cha kisasa (Green House). Mhagama amesema hayo akiwa katika ziara mikoani Songea na Iringa kwa lengo la uhamasishaji na kukagua maeneo yaliyotengwa kwa ajili ya kujenga vitalu nyumba (Green House) katika mikoa hiyo. Waziri Mhagama ameeleza kuwa serikali imeanzisha mradi huo ili kuhakikisha vijana wanafikiwa kwa kiasi kikubwa na vilevile, kuwawezesha kupata ujuzi na kujiajiri kupitia kilimo cha kisasa.

“Teknolojia hii itawawezesha vijana kulima katika eneo dogo, kupata mazao kwa wingi na kuweza kuyauza, vilevile kutumia eneo hilo kuweza kuajiri vijana wengine kwani asilimia zaidi ya 60% ya watu wanaojiajiri na kujishughulisha inatokana na mashamba”. Amefafanua Mhagama.

Mbali na hayo, Waziri huyo ameongeza kuwa vijana watafundishwa teknolojia hiyo ili waweze kuongeza thamani ya mazao yatakayozalishwa na kuagiza halmashauri zote kujipanga katika utayarishaji wa miundombinu katika maeneo hayo na kuhakikisha vijana wanatayarishwa mapema pamoja na kuanzishiwa kwa vyama vya ushirika (AMCOS) kwani wananchi wanataka kuona matunda ya mradi huo.