Waziri wa Nishati, Dk Medard Kalemani amesema nishati ya umeme ni muhimu kwa ajili ya uzalishaji viwandani hivyo serikali itahakikisha tatizo la umeme kukatika kwenye viwanda linadhibitiwa kwani hali hiyo sio salama viwandani. Dk. Kalemani amesema pamoja na changamoto hiyo, anawataka wawekezaji kuendelea kujenga viwanda kwani kuna umeme wa kutosha, ikiwa hivi sasa kuna akiba ya umeme wa ziada wa megawati 148. Waziri huyo amesema hayo mjini Kibaha alipotembelea maonyesho ya viwanda yanayofanyika kwenye viwanja vya Sabasaba ambapo ametumia fursa hiyo na kulielekeza Shirika la Maendeleo ya Petroli nchini (TPDC) kutangaza vituo vya gesi asilia ili wananchi wafahamu zaidi kuhusu gesi hiyo.
“Sera yetu kwa sasa tunataka sisi tutangulie na viwanda ndiyo viufuate na siyo viwanda kuwafuata kwani kufanya hivyo tutakuwa tumewaondolea kero ya kufuatilia masuala ya umeme. Ndio maana tunajenga miradi mikubwa ya uzalishaji umeme kama ule wa Rufiji Hydro Power unaotokana na maji utakaozalisha megawati 2,100 na Rumakali utakaozalisha megawati 358 na ule wa gesi wa Kinyerezi kuhakikisha viwanda havikwami. Nimetembelea na kukagua mabanda na nimeona mahitaji na kati ya mabanda 17 ambayo ni ya viwanda wanasema umeme siyo tatizo licha ya sehemu kama mbili wamelalamika kuwa umeme kwao ni changamoto”. Amesema Dk. Kalemani.
Kwa upande wake, Mkuu wa wilaya ya Kibaha ,Assumpter Mshama amesema wataanisha maeneo yaliyotengwa kwa ajili ya viwanda ili huduma hiyo ipelekwe kabla ya ujenzi wa viwanda kuanza na kuongeza kuwa, wilaya ya Kibaha ina viwanda vingi hivyo uwepo wa nishati ya umeme wa uhakika ni muhimu ili kuondokana na changamoto zilizopo.
Discussion about this post