Ofisa Maendeleo ya Biashara kutoka Benki ya Wananchi Tandahimba (Tacoba) mkoani Mtwara Said Nambecha amesema benki hiyo imejipanga kutoa mikopo kwa wavuvi ili kuwasaidia kuongeza mtaji na kuboresha shughuli zao ili nao pia waweze kuchangia katika pato la taifa. Nambecha amesema hayo katika viwanja vya maonyesho ya wakulima maarufu kama nanenane yanayoendelea katika mkoa wa Lindi.
Ofisa huyo ameeleza kuwa, taasisi nyingi za fedha zimekuwa na wakati mgumu kuwapatia mikopo wavuvi kutokana na kwamba, wanapata wasiwasi na fedha hizo kurejeshwa kutokana na kundi hilo kukumbwa na misukosuko mbalimbali ikiwemo kuzama baharini na kupoteza maisha. Ameongeza kuwa changamoto kama hizo zinafanya benki nyingi kushindwa kuwaamini na kuwapatia mikopo wanayohitaji.
Nambecha amedai kuwa Tacoba inaangalia utaratibu wa kuwezesha kundi hilo kukopeshwa vifaa badala ya kupatiwa fedha taslimu kutokana na mchango wa sekta hiyo katika uchumi wa taifa.
Discussion about this post