Meneja wa Benki ya NMB mkoani Njombe, Daniel Zake amesema zaidi ya Sh. 600 milioni zimekopeshwa kwa wajasiriamali mkoani humo baada ya kurasimisha ardhi, hali iliyopelekea kupata mikopo hiyo yenye dhumuni la kuwawezesha wajasiriamali hao kupata mitaji na kuanzisha biashara ili kukuza uchumi. Zake ameeleza kuwa, kazi inayofanywa kupitia Mpango wa Kurasimisha Rasilimali na Biashara za Wanyonge (MKURABITA) inalenga kuwainua wajasiriamali wadogo.
Akizungumza wakati wa mahojiano maalum kwenye mafunzo kwa wajasiriamali hao. Meneja huyo ameeleza kuwa, lengo ni kuwajengea uwezo zaidi wajasiriamali ili kuongeza tija katika shughuli wanazofanya na kupanua wigo wa uzalishaji.
“Tunatoa mikopo kwa kutumia leseni za makazi na hati za kimila ambazo wananchi wanapata baada ya kurasimisha maeneo yao na kupimwa na hatimaye kupata hati na katika swala hili, tunapongeza Mpango wa Taifa wa Kurasimisha Rasilimali na Biashara za Wanyonge Tanzania (MKURABITA)”. Amesema Zake.
Pamoja na hayo, Meneja huyo amesema wajasiriamali wanaporasimisha biashara zao, mbali na kupanua wigo wa biashara hizo pia wanaongeza masoko, ajira na kuiwezesha serikali kuongeza ukusanyaji wa kodi na mapato kutokana na kukua kwa uzalishaji na shughuli za ujasiriamali kwa ujumla.
Discussion about this post