Rais Mstaafu wa Tanzania Benjamin Mkapa amesema endapo kutakuwa na uwekezaji madhubuti katika sekta za kilimo, uvuvi na ufugaji, uchumi wa kati na Tanzania ya viwanda vinaweza kufikiwa. Mkapa ameeleza kuwa lengo la kufikia uchumi wa kati na wa viwanda haliwezi kutimia kama uwekezaji katika sekta hizo sio wa kuridhisha.
“Tumekuwa tukihubiri juu ya uchumi wa kati na wa viwanda lakini kama hatutakuwa na uwekezaji wa kutosha katika kilimo, mifugo na uvuvi tusitegemee kuyafikia malengo ya 2025 ya Tanzania ya viwanda”. Amesema Mkapa.
Aidha, Rais huyo mstaafu aliyesema haya katika maadhimisho ya siku ya wakulima (Nanenane) ameongeza kuwa maonyesho hayo yanatakiwa kutumika kama fursa ya kujifunza teknolojia mbalimbali ili kuongeza tija na kuinua pato la taifa kwani kupitia maadhimisho ya nanenane, mawazo na fikra za watu kuhusu uchumi wa kati yanaweza kubadilishwa.
Mkapa amesema mchango wa maonyesho hayo ni mkubwa kwani yanalenga kutoa fursa kwa watu kujifunza teknolojia bora ambazo zitawasaidia kuzalisha kwa tija zaidi, ikiwa takribani asilimia 65,5 ya watanzania wote wameajiriwa kupitia sekta hii huku serikali ikitegemea kuwa hadi kufikia mwaka 2020, ajira zinazotokana na viwanda zitafikia asilimia 40 kutokana na uwekezaji unaofanywa na serikali, taasisi binafsi pamoja na wananchi katika sekta hiyo.
Discussion about this post