Afisa Mtendaji Mkuu wa Utawala kiwanda cha sukari TPC Jaffari Ally amesema kiwanda hicho kimeongeza uzalishaji wa sukari kutoka tani 36,000 hadi tani 110,000 ili kutatua changamoto ya upungufu wa sukari ya majumbani nchini ambayo ni tani 100,005. Afisa huyo ameeleza hayo katika ziara ya Naibu Waziri wa Kilimo, Omari Mgumba pamoja na Waziri wa Viwanda,Biashara na Uwekezaji Joseph Kakunda kiwandani hapo na kuongeza kuwa, bado wanaendelea na upanuzi wa mashamba na wanatarajia kuzalisha hadi tani 120,000 .
Katika ziara hiyo, Jaffari ameipongeza serikali kwa kuziba mianya yote ya biashara magendo ya sukari ambapo sukari zilizo chini ya viwango zilikuwa zikiingizwa nchini na kushindanishwa katika masoko ya ndani hivyo kuathiri biashara ya viwanda vya ndani.
“Wazalishaji wa sukari tunapenda kuipongeza serikali ya awamu ya tano kwa kuzibiti mianya ya uingizwaji holela wa sukari ,miaka ya nyuma soko lilichafuliwa na sukari iliyokuwa ikiingizwa nchini isiyokuwa na viwango na iliingizwa kwa njia ya magendo bila kulipiwa kodi wala ushuru ,sukari ambayo ilikuwa ikiathiri afya za watanzania tunaishukuru serikali kwa kuziba mianya”. Amesema Jaffari.
Kwa upande wake, Naibu Waziri wa Kilimo Omari Mghumba ametoa wito kwa wawekezaji katika kiwanda hicho kupanua wigo wa kilimo cha miwa ili kuongeza uzalishaji wa sukari.
Discussion about this post